Kudala-dala kwakukho inkuku egama linguCikizwa nkuku leyo eyayiyinkedama.
Wathi esakhangela ukutya wabona intuku iphuma emngxunyeni wayo. Yamphoxa kanobomi esathetha nayo.
Walila uCikizwa ebuhlungu, egixa, yaxolisa intuku xa imbona elila.
Intuku yaxolisa kakhuuulu kuCikizwa yamphathela isiselo esimnandi namaqebengwana batya, basela kunye kwamnandi kwanjeyaaa.
Ukususela loo mini baba ngabahlobo abasenyongweni. Bagonana kwanzima nokuba omnye asuke komnye bebonisa uthando nobuhlobo obuqinileyo nenkathalo.
Wagoduka uCikizwa eshiya umhlobo
wakhe ngoxolo.
Uthe elele uCikizwa weva ilizwi likaMama wakhe ephupheni lisithi “Utshata nini Cikizwa’’?
“Tyhini ndiyaphupha’’ waphaphama wavuka ebuthongweni uCikizwa.
Kwesi sixeko kwakukho indlovu ekhohlakeleyo neyayithanda ukuqumbisa nokucaphukisa uCikizwa ngamazwi ayo.
Wathi eyibulisa ngomdla yasuka yona yamphoxa, ihlekisa ngaye isithi, “Ha ha ha suka nkedamandini eqavileyo, ufuna ntoni kum, utsho ngokubhitya nje, ngathi uvinjwe umbona?” Weva kabuhlungu gqitha uCikizwa exheleke mpela emphefumlweni.
Endleleni egodukayo udibene noGusha Bhoqo wamphalazela imbilini yakhe ngoko nangoko. Wathuthuzelwa uCikizwa leli qhawe waxola wanalo noncumo.
Ugusha wade wamema uCikizwa ukuba eze kwisidlo sangokuhlwa kwakhe. Kwatyiwa umngqusho omnandi. Kwadlalwa umculo emva kweso sidlo. Wajayiva nosapho lwakwaGusha kwaqhum’uthuli wade walibala ngeengxaki zakhe xa zizonke.
Ngemini elandelayo kwanetha imvula enkuuulu, izilwanyana ezininzi zemka namanzi. Yayibuhlungu kakhulu le mini. uCikizwa wasindiswa kukuba
ihoko yakhe yayenziwe yomelela ngutata wakhe esaphila apho wathi wenza nomjelo wokuba amanzi angadami.
Kwasa imvula imkile. Iintyatyambo ze gqi! ziyiloo mibala mihle. Kwakubeth’impepho ehlaziyayo.
Nanko uNdlovu torhwana elusizi eqhwalela yaye kunzima kuye ukuhamba, ebhonga nokubhonga.
Okokoko wazalwa uCikizwa zange asive
isikhalo esingako. uCikizwa wafowunela i-ambulensi ngokukhawuleza.
Wafumana uncedo uNdlovu, wabotshwa umlenze wakhe, wahlatywa neenaliti kamva intlungu zakhe zathomalala. Akuziva engcono wamncoma kakhulu uCikizwa ngobubele bakhe embulela ngala mazwi.
“Cikizwa mntwana wam uze ungatshintshi, hlala ulolu hlobo ululo uze uqhubeke uhlonipha yaye ubathande abantu nezilwanyana.”
Wazikhupha uCikizwa ngenye imini waya kumlambo okufutshane nolwandle. Kwakukho
abantu nezilwanyana kulotywa iintlanzi ngaselunxwemeni apho, kusojiwa ezi ntlanzi zibanjisiweyo kutyiwa neerostile ezazibhakwe kakuhle zilafulafu.
Ethubeni uCikizwa waphawula ubuhle bentlanzi egama linguGumbi. Emva kokwazana kwabo babesoloko bechitha ixesha kunye nale ntlanzi. uCikizwa wagqiba ekubeni ayeke ukutya intlanzi ehlonipha uGumbi.
Izilwanyana zamane zihlekisa ngobu buhlobo bentlanzi nenkuku zisithi, “Inene le nto iza
kuphelela emoyeni.’’
Basuka uGumbi noCikizwa bathandana ngokungakumbi. uCikizwa wafundiswa ukuqubha abethe is’gagamfu, isiqolo antywile nokuntywila. Kwelinye icala uGumbi wafundiswa ukuqhwaya ezikhangelela ukutya.
Intlanzi yacela umtshato kuCikizwa wavuma
ngoko nangoko. Bobabini bagqiba ukuba mabatshate ngomGqibelo olandelayo kulaa
ndawo yabo yesiqhelo.
Ngokwenene yafika imini ekade ixelwa.
Ilanga likhuph’intlanzi emanzini.
Wawungemhle umtshato yehaa!
Zatsho ngekwayala ecula kamnandi izilwanyana.Kwakukho ooxam, iminenga, iingwenya, intini, ookrebe, idolphin, iigusha, iinkomo, izinja, iimpunzi, imivundla, iincanda, izilenzi nezinye ke. Zazimanyene kule ngoma:
Kumnandi aph’emtshatweni wentlanzi
kumnand’aph’emtshatweni weNkukhu.
The fish and chicken_s wedding Xhosa
