UTlotlego unetheko lokuphunga
losapho LONKE.
“Makhulu, bangaphi abantu
abezayo ukuzokuphunga?”
“Nguwe, ndim, nguMama noTata. Kunye nodadewenu omncinci, uTshiamo.”
UTlotlego ubala iikomityi zeti njengoko
ezithatha ekhitshini.
“Inye, zimbini, zintathu, zine, kunye nenye kaMakhulu!”
UTlotlego uya esituphini
aze abeke iikomityi etafileni.
“Inye, zimbini, zintathu, zine,
kunye...?”
“Ndibona iikomityi ezine kuphela,” utsho uMakhulu,
“kodwa thina singabantu
abahlanu.” “Ngoku bendisekhitshini
ngaphambili, iikomityi bezintlanu!”
uyakhuza uTlotlego.
UTlotlego ubala iipleyiti ezincinci ezintle
njengoko ezikhupha ekhabhathini.
“Inye, zimbini, zintathu, zine, zintlanu!
Umntu ngamnye unepleyiti yakhe.”
UTlotlego uya esituphini aze
abeke iipleyiti ecaleni kweekomityi. “Inye, zimbini, zintathu, zine, kunye...?”
“Ndibona iipleyiti ezine kuphela,”
utsho uMakhulu,
“kodwa thina singabantu abahlanu.”
UTlotlego ubala iibhiskiti njengoko ezikhupha eskhaftineni.
“Inye, zimbini, zintathu, zine, kunye neyesihlanu!”
UTlotlego uya esituphini aze abeke iibhiskiti ezipleyitini.
“Inye, zimbini, zintathu,zine, kunye…?”
“Ndibona iibhiskiti ezine kuphela,” utsho uMakhulu,
“kodwa thina singabantu abahlanu.”
UTlotlego udideke kakhulu.
Uyazi ukuba ubebala kakuhle.
Kuqala, ebeneebhiskiti ezintlanu,
kodwa ngoku kukho ezine kuphela.
Ziphunguke NJANI ezi bhiskiti?
UTlotlego ubala amagaqa eswekile
njengoko ewakhupha kwisitya seswekile.
“Linye, mabini, mathathu, mane, kunye nelesihlanu!”
UTlotlego uya esituphini aze abeke amagaqa eswekile etafileni.
Kwesi sihlandlo, uqinisekile ukuba
uva ukugigitheka.
“Linye, mabini, mathathu, mane, kunye…?”
“Mahlanu!” kuvakala ilizwi
phantsi kwetafile.
UTlotlego uyagoba akhangele phantsi kwetafile.
Othukile, ubona iseti yeti epheleleyo phantsi kwetafile!
Nazi zonke ezi komityi, ipleyiti, ibhiskiti, neqhekeza
leswekile ebezilahlekile. ZINTLANU!
Xa uMama noTata befika ekhaya
bevela emsebenzini, bonke
baphungela esituphini.
Omnye, ababini, abathathu
baphungela etafileni, baze ababini baphungele ngaphantsi kwayo!
Tlotego_s tea party Xhosa
